1982-ൽ കോളാറിലെ ഗോൾഡ് ഫീൽഡ് കോളേജ് ഓഫ് എഡ്യൂക്കേഷനിൽ നിന്ന് ബി.എഡ്. ബിരുദം നേടി. 1984-ൽ കൊല്ലം കുരീപ്പുഴയിലെ എസ്.എം. എച്ച്.എസ്. സ്കൂളിൽ ഹൈസ്കൂൾ അധ്യാപികയായി സേവനം ആരംഭിച്ചു. 1992-ൽ ബാംഗ്ലൂരിൽ റീജിയണൽ ഇൻസ്റ്റിറ്റ്യൂട്ട് ഓഫ് ഇംഗ്ലീഷ് സംഘടിപ്പിച്ച മൂന്നു മാസത്തെ പരിശീലന കോഴ്സിൽ കേരള എഡ്യൂക്കേഷൻ ഡിപ്പാർട്ട്മെന്റിനെ പ്രതിനിധീകരിക്കാനുള്ള അവസരം ലഭിച്ചു. എസ്.എം. എച്ച്.എസ്. കുരീപ്പുഴ, ചക്കുവരയ്ക്കൽ എച്ച്.എസ്., ഗവ. ഹയർ സെക്കൻഡറി സ്കൂൾ കരുനാഗപ്പള്ളി, എ.എസ്. എച്ച്.എസ്. നീണ്ടകര തുടങ്ങിയ വിദ്യാലയങ്ങളിൽ സേവനമനുഷ്ഠിച്ചു. 2016 മെയ് മാസത്തിൽ 32 വർഷത്തെ സേവനത്തിനൊടുവിൽ നീണ്ടകര എ.എസ്. എച്ച്.എസ്. സ്കൂളിൽ നിന്ന് വിരമിച്ചു. ഇതിൽ അഞ്ച് വർഷം ഹെഡ്മിസ്ട്രസായും സേവനം അനുഷ്ഠിച്ചു. കേരള സ്കൂൾ ടീച്ചേഴ്സ് അസോസിയേഷനിൽ സജീവ പങ്കാളിത്തം വഹിച്ചു. 2012-ൽ കൊല്ലത്തെ രമാദേവി പുസ്തകശാല പ്രസിദ്ധീകരിച്ച ‘അക്ഷയദീപങ്ങൾ’ എന്ന കവിതാസമാഹാരത്തിൽ ‘സ്ത്രീ’ എന്ന തൂലികാനാമത്തിൽ കവിത പ്രസിദ്ധീകരിച്ചു. നാലു വർഷമായി ബാംഗ്ലൂരിലെ യെലഹങ്കയിൽ താമസിച്ചു വരുന്നു. ബാംഗ്ലൂർ റൈറ്റേഴ്സ് ഫോറത്തിന്റെ സജീവാംഗവുമാണ്.