സിനിമ, വി.എഫ്.എക്സ്, ആനിമേഷൻ, ഗെയിമിംഗ് മേഖലകളിൽ 25 വർഷത്തിലേറെ പ്രവൃത്തിപരിചയമുള്ള ക്രിയേറ്റീവ് പ്രൊഫഷണലാണ് സിന കെ.എസ്. കേരളത്തിൽ ജനിച്ചുവളർന്ന സിന എഞ്ചിനീയറിംഗ് ബിരുദത്തിന് ശേഷമാണ് ഈ രംഗത്തേക്ക് കടന്നുവന്നത്. ഹോളിവുഡ് ചിത്രങ്ങളിലും ഇന്ത്യൻ സിനിമകളിലും വി.എഫ്.എക്സ് നിർമ്മാതാവായും ക്രിയേറ്റീവ് ഡയറക്ടറായും പ്രവർത്തിച്ചിട്ടുള്ള ഇവർ, ആനിമേഷനും വി എഫ് എക്സിനും സ്റ്റോറിടെല്ലിംഗിനും മുൻഗണന നൽകുന്ന ‘ഗാലോപിക്സ് ഇമേജിനിയറിംഗ്’ സ്റ്റുഡിയോയുടെ സഹസ്ഥാപക ഡയറക്ടറാണ്. നിലവിൽ ബാംഗ്ലൂർ കേന്ദ്രീകരിച്ചാണ് ഇവർ പ്രവർത്തിക്കുന്നത്. ​ഔദ്യോഗിക ജീവിതത്തോടൊപ്പം എഴുത്തുകാരി, ചിത്രകാരി, ക്ലാസിക്കൽ നർത്തകി എന്നീ നിലകളിലും സിന സജീവമാണ്. ‘വിന്റർ ഹ്യൂസ്, എ ഹാർവെസ്റ്റ് ഓഫ് സോളിറ്റ്യൂഡ്’ എന്ന ഇംഗ്ലീഷ് ചിത്ര കവിതാ പുസ്തകവും, ‘നിഴൽയാത്ര’ എന്ന മലയാള കവിതാ സമാഹാരവും ഇവർ രചിച്ചിട്ടുണ്ട്. 55-ാമത് ഗോവ അന്താരാഷ്ട്ര ചലച്ചിത്രമേളയിൽ പ്രദർശിപ്പിച്ചതും എൻ.എഫ്.ഡി.സി നിർമ്മിച്ചതുമായ 'റാണി ഗൈഡിൻലിയു- ദ ഐകോണിക് വുമൺ ഓഫ് നോർത്ത്ഈസ്റ്റ് ഇന്ത്യ' എന്ന ആനിമേറ്റഡ് ഷോർട്ട് ഫിലിമിന്റെ തിരക്കഥാകൃത്താണ് സിന. ഈ ചിത്രത്തിന് മികച്ച തിരക്കഥാകൃത്തിനുള്ള ‘ആൻ അവാർഡ്’ ലഭിച്ചു. ​ലണ്ടൻ സ്‌ക്രീൻപവർ അവാർഡ്, മൈസൂർ – രാജസ്ഥാൻ ഇന്റർനാഷണൽ ഫെസ്റ്റിവലുകളിലെ മികച്ച തിരക്കഥാകൃത്തിനുള്ള പുരസ്കാരങ്ങൾ, പ്രോവെസ് ബെസ്റ്റ് ഓതർ അവാർഡ്, പനോരമ ഇന്റർനാഷണൽ ലിറ്ററേച്ചർ പീപ്പിൾസ് ചോയ്സ് അവാർഡ് 2025 തുടങ്ങി നിരവധി അംഗീകാരങ്ങൾ സിന നേടിയിട്ടുണ്ട്. കൂടാതെ, ജയ്പൂരിൽ വെച്ച് നടന്ന ‘മിസിസ് ഇന്ത്യ അച്ചീവർ 2023’ പദവിയും കരസ്ഥമാക്കിയിട്ടുണ്ട്.