കാസർഗോഡ് ജില്ലയിലെ ഉദിനൂരിൽ ജനിച്ച പ്രൊഫ. (ഡോ.) എ. എം. ശ്രീധരൻ നാടോടിവിജ്ഞാനം, താരതമ്യസാഹിത്യം, വിവർത്തനപഠനം, നിഘണ്ടുനിർമാണം എന്നീ മേഖലകളിലെ പ്രമുഖ പണ്ഡിതനാണ്. കാലിക്കറ്റ് സർവകലാശാലയിൽ നിന്ന് നാടോടിവിജ്ഞാനത്തിൽ പി.എച്ച്.ഡി. നേടി. നെഹ്‌റു ആർട്സ് ആൻഡ് സയൻസ് കോളേജിൽ അധ്യാപകനായി സേവനം ആരംഭിച്ച അദ്ദേഹം പിന്നീട് കണ്ണൂർ സർവകലാശാലയിൽ മലയാളവിഭാഗം പ്രൊഫസറും മേധാവിയുമായി. തുടർന്ന് ഡോ. പി. കെ. രാജൻ മെമ്മോറിയൽ ക്യാമ്പസ് ഡയറക്ടർ, വിദൂരവിദ്യാഭ്യാസ ഡയറക്ടർ, യു.ജി.സി. എച്ച്.ആർ.ഡി.സി. ഡയറക്ടർ, ഭാഷാ-സാഹിത്യ ഫാക്കൽറ്റി ഡീൻ തുടങ്ങി നിരവധി അക്കാദമിക-ഭരണ ചുമതലകൾ വഹിച്ചു. ഇപ്പോൾ ബെംഗളൂരുവിലെ അലയൻസ് സർവകലാശാലയിലെ Centre of Excellence in Indian Knowledge Systems ഡയറക്ടറാണ്.

മലയാളത്തിലും ഇംഗ്ലീഷിലുമായി നിരവധി ഗ്രന്ഥങ്ങൾ രചിക്കുകയും സമ്പാദനം നിർവഹിക്കുകയും ചെയ്തിട്ടുണ്ട്. ബ്യാരി–മലയാളം, തുളു–മലയാളം നിഘണ്ടുക്കൾ, ശ്രീരാമായണ ദർശനം, മണിമേഖലൈ എന്നിവയുടെ വിവർത്തനങ്ങൾ ഉൾപ്പെടെ ശ്രദ്ധേയമായ കൃതികൾ പ്രസിദ്ധീകരിച്ചു. കേരള സാഹിത്യ അക്കാദമി വിവർത്തന പുരസ്കാരം (2023), കേരള ഫോക്‌ലോർ അക്കാദമി പുരസ്കാരം തുടങ്ങി നിരവധി അംഗീകാരങ്ങൾ നേടിയ അദ്ദേഹം ദക്ഷിണേന്ത്യയിലെ പ്രമുഖ ഭാഷാ-സാഹിത്യ ഗവേഷകരിൽ ഒരാളായി അറിയപ്പെടുന്നു.

PHONE: +91 9447314292