1978 മുതൽ മുംബൈയിൽ സ്ഥിരതാമസമാക്കിയ കെ. പി. വിനയൻ, പരസ്യ-മാധ്യമ രംഗത്തും വിവർത്തന സാഹിത്യത്തിലും നാടക-ചലച്ചിത്ര മേഖലയിലും സജീവ സാന്നിധ്യമാണ്. ഒരു പ്രമുഖ പരസ്യക്കമ്പനിയിൽ ഭാഷാവിഭാഗം മേധാവിയായി ദീർഘകാലം പ്രവർത്തിച്ച അദ്ദേഹം, പത്രം, റേഡിയോ, ടെലിവിഷൻ എന്നീ മാധ്യമങ്ങൾക്കായുള്ള പരസ്യങ്ങൾ വിവിധ ഇന്ത്യൻ ഭാഷകളിലേക്ക് വിവർത്തനം ചെയ്യുകയും ഭാഷാപരമായ ഏകോപനത്തിന് നേതൃത്വം നൽകുകയും ചെയ്തു.

മറാഠി, ഹിന്ദി, മലയാളം ഭാഷകളെ ബന്ധിപ്പിക്കുന്ന വിവർത്തകനെന്ന നിലയിൽ അദ്ദേഹം ശ്രദ്ധേയനാണ്. സംവിധായകൻ ജയരാജിനുവേണ്ടി മറാഠി സിനിമയായ ‘വളു (The Wild Bull)’-യുടെ സംഭാഷണങ്ങൾ മലയാളത്തിലേക്ക് വിവർത്തനം ചെയ്തു. സംവിധായകൻ പ്രവീൺ മോർഛാലെയുടെ ‘സർ മാഡം സർപഞ്ച്’ എന്ന ഹിന്ദി സിനിമയും മലയാളത്തിലേക്ക് മൊഴിമാറ്റം ചെയ്തു. കൂടാതെ ‘ചെക്ക് മേറ്റ്’, ‘മുംബയ്ചെ കാവ്ലേ’, ‘വാഡാ ചിരേബന്ദി’, ‘ബിറ്റ്വീൻ ദി ലൈൻസ്’ എന്നീ ശ്രദ്ധേയമായ മറാഠി നാടകങ്ങൾ മലയാളത്തിലേക്ക് വിവർത്തനം ചെയ്തിട്ടുണ്ട്.

ഊർമിള പവാർ, സതീഷ് താംബെ തുടങ്ങിയ പ്രമുഖ എഴുത്തുകാരുടെ കഥകൾ മലയാളത്തിലേക്ക് വിവർത്തനം ചെയ്ത അദ്ദേഹത്തിന്റെ രചനകൾ അനുകാലികം, കേരള സാഹിത്യ അക്കാദമി പ്രസിദ്ധീകരണങ്ങൾ, മാതൃഭൂമി മുംബൈ പതിപ്പ് എന്നിവയിൽ പ്രസിദ്ധീകരിച്ചിട്ടുണ്ട്.

അഭിനയരംഗത്തും സജീവമായ അദ്ദേഹം, ശ്യാം ബെനഗൽ സംവിധാനം ചെയ്ത ‘സംവിധാൻ’ എന്ന ടെലിവിഷൻ പരമ്പരയിലും ‘പാപമരം’ എന്ന ഹ്രസ്വചിത്രത്തിലും അഭിനയിച്ചിട്ടുണ്ട്. ‘അവിനാശ്’, ‘ഓർമ്മകൾ ഉണർത്താതെ’, ‘മുംബൈയിലെ കാക്കകൾ’, ‘ബ്ലാക്ക് ഫ്രൈഡേ’ തുടങ്ങിയ നാടകങ്ങളിലും ശ്രദ്ധേയമായ വേഷങ്ങൾ അവതരിപ്പിച്ചു. മൊബൈൽ ഫോണുകളുടെ ഉപയോഗത്തെ ആസ്പദമാക്കി രചിച്ച ഒരു മലയാളം സ്കിറ്റും വിവിധ വേദികളിൽ അവതരിപ്പിച്ചിട്ടുണ്ട്.

മലയാളത്തോടൊപ്പം മറാഠി ഉൾപ്പെടെയുള്ള ഇന്ത്യൻ ഭാഷകളോടും സാഹിത്യത്തോടും നാടക-ചലച്ചിത്രങ്ങളോടും അതിയായ താൽപര്യമുള്ള അദ്ദേഹം, വിവർത്തനത്തിലൂടെയും അഭിനയത്തിലൂടെയും ഭാഷകൾക്കും സംസ്കാരങ്ങൾക്കും ഇടയിൽ പാലം തീർക്കുന്ന സാംസ്കാരിക പ്രവർത്തകനാണ്.