കേരളത്തിൽ തിരുവല്ലക്കടുത്തുള്ള പ്രശാന്ത സുന്ദരമായ കുന്നന്താനത്തിന്റെ മണ്ണിൽ നിന്ന് ബാംഗ്ലൂരെത്തിയ  തങ്കമ്മ സുകുമാരൻ, ഇന്ന് ബാംഗ്ലൂരിൽ  ബാസവനഗറിലാണ് സ്ഥിര താമസം.  ഭർത്താവ് എം.ഇ.എസ്സിൽ  ജോലി ചെയ്തിരുന്നതിനാൽ ജീവിതത്തിന്റെ ചില വർഷങ്ങൾ ഗോവയിലും ചെലവഴിച്ചു. 2013-ൽ ഭർത്താവിനെ നഷ്ടപ്പെട്ടെങ്കിലും, അതിജീവനത്തിന്റെ ശക്തിയും സാമൂഹിക-സാംസ്കാരിക മേഖലകളോടുള്ള സമർപ്പണവും കൊണ്ട് അവർ സമൂഹത്തിൽ സ്വന്തം സാന്നിധ്യം ഉറപ്പിച്ചു. മലയാളഭാഷയുടെ മധുരവും പാരമ്പര്യവും പുതിയ തലമുറയിൽ വളർത്തിപ്പിടിക്കണമെന്ന ആഗ്രഹത്തോടെ, കുട്ടികൾക്ക് മലയാളം പഠിപ്പിക്കുന്ന ക്ലാസുകൾ വിവിധ സംഘടനകളുടെ നേതൃത്വത്തിൽ അവർ വർഷങ്ങളായി സംഘടിപ്പിച്ചു വരുന്നു. കഥാരംഗം, കൈരളി കലാ സമിതി, ശാസ്ത്ര സാഹിത്യ വേദി, പു.ക.സാ. എന്നീ സാംസ്കാരിക വേദികളിൽ അവരുടെ സജീവ സാന്നിധ്യം എന്നും ശ്രദ്ധേയമാണ്. റീഡേഴ്‌സ് ആൻഡ് റൈറ്റേഴ്സ് ഫോറം-ൽ കമ്മറ്റി അംഗമായി പ്രവർത്തിച്ചതിലൂടെ സാഹിത്യലോകത്തോടുള്ള അവരുടെ അടുപ്പം കൂടുതൽ തെളിഞ്ഞു. കേരള സമാജം ദൂരവാണിനഗർ, ബാംഗ്ലൂർ കേരള സമാജം തുടങ്ങിയ സാംസ്‌കാരിക സംഘടനകളിൽ നടത്തിവരുന്ന പ്രവർത്തനങ്ങളിൽ അവര് തുടരെ പങ്കെടുത്തുകൊണ്ട് മലയാളി സമൂഹത്തെ ഒന്നിപ്പിക്കാനും സാംസ്കാരിക പൈതൃകം നിലനിർത്താനുമായുള്ള പ്രവർത്തനങ്ങളിൽ സജീവ പങ്കുവഹിച്ചുവരുന്നു.