തൃശ്ശൂർ ജില്ലയിലെ കുന്നംകുളത്തിനടുത്തുള്ള അക്കിക്കാവാണ് സരസ്വതി വിജയകുമാരന്റെ സ്വദേശം. കുന്നംകുളത്തിൽ നിന്ന് ബി.കോം ബിരുദം നേടിയ ശേഷം 1993-ൽ വിവാഹിതയായി മുംബൈയിലേക്ക് കുടിയേറി. വിദ്യാർത്ഥിനിയായിരിക്കുമ്പോൾ കഥ, കവിത, ലേഖനം തുടങ്ങിയ സാഹിത്യരചനകളിലും കലാപരിപാടികളിലും സജീവ സാന്നിധ്യമായിരുന്നു. പിന്നീട് കുടുംബജീവിതത്തിന്റെയും മക്കളുടെ വിദ്യാഭ്യാസത്തിന്റെയും തിരക്കുകൾക്കിടയിൽ എഴുത്തിൽ ഇടവേള വന്നെങ്കിലും, ഡോംബിവിലിയിൽ സ്ഥിരതാമസമായതോടെ മലയാളസമാജത്തിന്റെ പ്രവർത്തനങ്ങളിലൂടെ വീണ്ടും സാഹിത്യരംഗത്തേക്ക് മടങ്ങിയെത്തി. സാമൂഹിക-സാംസ്കാരിക പ്രവർത്തനങ്ങളോടൊപ്പം വിദ്യാർത്ഥികൾക്കായി ട്യൂഷൻ ക്ലാസുകളും നടത്തിവരുന്നു. ഡോംബിവിലി കേരള സമാജത്തിന്റെയും കൈരളി സമാജത്തിന്റെയും പ്രവർത്തനങ്ങളിൽ സജീവമാണ്. വിവിധ പ്രസിദ്ധീകരണങ്ങളിൽ കവിതകളും ലേഖനങ്ങളും പ്രസിദ്ധീകരിച്ചിട്ടുണ്ട്. സാമൂഹികബോധവും സൃഷ്ടിപരമായ എഴുത്തും സമന്വയിപ്പിക്കുന്ന വ്യക്തിത്വമാണ് സരസ്വതി വിജയകുമാരന്റേത്. ഭർത്താവിനും മക്കളായ വിഷ്ണുവിനും ഗോപികയ്ക്കുമൊപ്പമാണ് ഇപ്പോഴത്തെ താമസം.