തൃശ്ശൂർ ജില്ലയിൽ ജനിച്ച അർച്ചന സുനിൽ ഇപ്പോൾ ബാംഗളൂരിൽ സ്ഥിരതാമസമാക്കി സാഹിത്യ-സാംസ്കാരിക രംഗങ്ങളിൽ സജീവമായി പ്രവർത്തിക്കുന്നു. കഥ, കവിത, ലേഖനം തുടങ്ങിയ സാഹിത്യരൂപങ്ങളിൽ ആനുകാലികങ്ങളിലും സാമൂഹിക മാധ്യമങ്ങളിലും ശ്രദ്ധേയമായ സാന്നിധ്യമാണ്. 2014-ൽ ബാംഗളൂർ മലയാളി റൈറ്റേഴ്സ് ആൻഡ് ആർട്ടിസ്റ്റ്സ് ഫോറത്തിന്റെ കഥാമത്സരത്തിൽ രണ്ടാം സ്ഥാനവും, 2015-ൽ കേരള സമാജം നോർത്തിന്റെ കവിതാരചനാ പുരസ്കാരവും നേടി. തുടർന്ന് നിരവധി സാഹിത്യ മത്സരങ്ങളിൽ പുരസ്കാരങ്ങൾക്കും അംഗീകാരങ്ങൾക്കും അർഹയായി. ആമാശയത്തിലെ കൺപീലികൾ എന്ന കഥാസമാഹാരവും അസ്തമിക്കാത്ത ഭൂമി എന്ന കവിതാസമാഹാരവും ഉൾപ്പെടെ നിരവധി കൃതികൾ പ്രസിദ്ധീകരിച്ചിട്ടുണ്ട്. വിവിധ കവിതാ-കഥാസമാഹാരങ്ങളിലൂടെയും ആന്തോളജികളിലൂടെയും സാഹിത്യലോകത്ത് സാന്നിധ്യമുറപ്പിച്ച അർച്ചന, ബാംഗളൂരിലെ സാഹിത്യസംഘടനയായ “സാഹിതി”യുടെ ചെയർപേഴ്‌സണായും ബാംഗളൂർ മലയാളി റൈറ്റേഴ്സ് ഫോറത്തിന്റെ ട്രഷററായും പ്രവർത്തിച്ചുവരുന്നു.